Serramus s’annu cun su ripassu de su traballu nostru.
In su 2025, Sardware at sighidu cun sa valorizatzione de sa limba sarda in is ispàtzios digitales e sotziales, traballende pro tradùere aplicatziones lìberas e semper cun una praxis cussente de is problemas de sa comunidade linguìstica. S’annu s’est abertu cun una noa bella: intre is limbas chi si podent imperare pro cunfigurare Android 15 est intradu fintzas su sardu. Custu resurtadu testimòniat chi, gràtzias a su traballu de chie nche creet a beru, su sardu in is ispàtzios digitales non est prus petzi un’idea, ma est semper prus un’optzione tecnològica biva.
Semus istados presentes ocannu puru in Macumere pro su Linux Day 2025, isprichende e ammustrende comente is tecnologias lìberas podent agiudare a amparare e difùndere is limbas minorizadas. Amus ammustradu a mannos e pipios comente contribuire a un’archìviu de datos de boghe in sardu impreende CommonVoice, una tecnologia lìbera chi nos agiudat a preservare sa limba nostra in sa dimensione de su reconnoschimentu de boghe. A oe, su sardu tenet giai 3,7 oras de boghe registradas dae 41 utentes. Mancari siat unu sutzessu, sighimus a traballare pro ismanniare sa rapresentatividade de sa sotziedade sarda in totu sa diversidade sua: serbint prus contributos dae fèminas e dae prus atzentos.
In su beranu, Sardware at publicadu Fedilab (unu cliente pro atzèdere a retes sotziales lìberas e detzentralizadas comente Mastodon, tradùidu puru dae nois) e AntennaPod in sardu, una prataforma de podcasts lìbera. Isperamus cun custos progetos de contribuire a sa creatzione de cuntenutos in sardu de manera indipendente, pro chi sa presèntzia de su sardu chi non siat limitada a s’iscritura. Pro nois, su traballu nostru no est petzi tècnicu: est una manera pro connòschere, registrare e mantènnere biva sa limba nostra pro mèdiu de sa boghe de sa gente.
Su 2025 est istadu puru s’annu de sa prus crèschida manna de s’istòria de Sardware pro cantu tocat a is persones chi nde faghent parte: ocannu amus donadu su benebènnidu a Luca Atzori, Amedeo Casula, Lisandru Mongili, Lia Obinu e Catalina Roselli. Connosche a totu is membros de Sardware in sa pàgina nostra Chie semus.
In resumu, su 2025 de Sardware est istadu un’annada de conchistas tecnològicas, de formatzione e de ativismu linguìsticu. Sighimus a caminare, imparende dae is ainas lìberas e isparghende sa limba sarda intre is tzircùitos digitales, prontos a acarare is progetos imbenientes cun sa fortza de sa comunidade. E sighende a traballare pro una càusa chi connoschet sa potèntzia de sa limba in is ispàtzios de immoe e de su tempus benidore. Semus un’aina a su servìtziu de sa comunidade nostra, ma nos serbit totu s’inteligèntzia nostra.
Si nos boles agiudare, sighi·nos in is retes sotziales, còmpora is mallieddas e is bursas nostras o contribui cun unu donu econòmicu pro aparèssere in sa lista nostra de gente chi nos sustenet. Bonu e sardòfonu 2026!
0 commenti