S’ativismu de Sardware est ghiadu dae printzìpios ideològicos acapiados a sa soberania tecnològica e a sa responsabilidade linguìstica. Pro custa resone, traballamus a sa tradutzione, sa localizatzione e s’isvilupu de tecnologias lìberas e de còdighe abertu. Custos sunt unos cantos de is progetos in is chi amus traballadu. Imprea·ddos e agiuda·nos a ddos fàghere connòschere. Si agatas errores, tenes propostas de programmas o boles contribuire tue puru cun sa tradutzione, iscrie·nos!
Telegram est unu cliente de messagìstica lìberu e multiprataforma
pro telèfonos e elaboradores. Iscàrriga·ddu dae www.telegram.org e aderi a su canale de Sardware pro ischire comente ddu cunfigurare in sardu.
Mozilla Firefox est unu navigadore web lìberu e multiprataforma pro telèfonos e elaboradores. Iscàrriga·ddu dae www.mozilla.org/it/firefox/new e sèbera su sardu in sa Cunfiguratzione > Generale > Limbas. O iscrie·nos si ti serbit agiudu pro ddu cunfigurare in sardu.
Common Voice est unu progetu de Mozilla pro istantargiare unu corpus orale collaborativu pro totu is limbas, cun s’iscopu de fatzilitare sa creatzione de tecnologias de reconnoschimentu de boghe èticas. Nois de Sardware amus creadu sa versione in sardu. Contribui puru tue, dona sa boghe tua!
Mastodon est una rete sotziale lìbera, detzentralizada e federada. Impreat su protocollu ActivityPub e faghet parte de su Fediversu, un’universu de aplicatziones chi permitint sa federatzione intre issas. Sighi su profilu de Sardware in Mastodon.social!
Jitsi Meet est unu sistema de vìdeu-cunferèntzias lìberu pro elaboradores e telèfonos. Non rechedet nissuna installatzione e non serbit a si identificare cun unu contu pro cumintzare una mutida. Depes isceti abèrrere http://meet.jit.si, seberare unu nòmine pro s’addòbiu e cumpartzire su ligòngiu cun àtera gente. Podes fintzas iscarrigare s’aplicatzione pro telèfonos inoghe.
DuckDuckGo est unu motore de chirca de internet rispetosu de sa riservadesa de is utentes, ca non ti sighit. Permitit de chircare immàgines, mapas, còmporas, e fintzas de impreare chatbots de inteligèntzia artifitziale amparende semper s’identidade de s’utente.
AntennaPod est unu gestore de podcast pro telèfonos Android. Podet èssere iscarrigadu dae sa butega de aplicatziones Google Play o dae F-Droid, repositòriu de aplicatziones lìberas pro Android.
Nextcloud est unu programma lìberu de archiviatzione e sincronizatzione de documentos in sa nue virtuale. Agata unu frunidore de servìtzios chi impreant Nextcloud in sa pàgina ufitziale. Esistint aplicatziones puru pro telèfonos Android.
Su Ditzionàriu Cros pro Firefox est unu cumplementu de Firefox chi cuntenet su Curretore Ortogràficu Sardu, in manera chi potzas iscrìere chene de errores dae su navigadore web preferidu tuo.
F-Droid est unu repositòriu de aplicatziones lìberas pro telèfonos Android, alternativu a Google Play. Meda de is aplicatziones de custa pàgina s’agatant in cue. Cuntenet informatziones pro onni aplicatzione in pitzus de is potentziales problemas de seguresa.
AuroraStore est unu repositòriu de aplicatziones pro telèfonos Android, alternativu a Google Play. Meda de is aplicatziones de custa pàgina s’agatant in cue. Cuntenet informatziones pro onni aplicatzione in pitzus de is potentziales problemas de seguresa.
OsmAnd est unu navigadore GPS pro telèfonos basadu in pitzus de su progetu collaborativu OpenStreetMap. Iscàrriga·ddu dae sa butega de aplicatziones de su telèfonu tuo e nàviga in totu su mundu cun is topònimos sardos!
UbuntuTouch est unu sistema operativu pro telèfonos lìberu e de còdighe abertu. Controlla si ddu podes installare in unu de is dispositivos cumpatìbiles o còmpora unu telèfonu cun UbuntuTouch preinstalladu.
OmegaT est unu programma de tradutzione assistida lìberu e multiprataforma chi permitit sa gestione de memòrias de tradutzione, bases de datos de terminologia e motores de tradutzione automàtica.