Su grupu de ativistas pro sa presèntzia de su sardu in sa tecnologia at publicadu sa tradutzione de su gestore de podcasts lìberu

S’iscuadra de Sardware est pregiada de annuntziare sa publicatzione in sardu de su gestore de podcasts AntennaPod. S’aplicatzione, disponìbile pro Android, permitit a is utentes de chircare podcasts, ddos sarvare e ddos ascurtare. Comente totu is programmas chi traduimus in Sardware, AntennaPod est lìberu, rispetosu de sa diversidade linguìstica e de sa riservadesa. Essende aici, AntennaPod no impreat publitzidade pro guadangiare dinare. Pro pònnere AntennaPod in sardu, depes isceti andare a Cunfiguratziones de Android> Sistema> Limbas> Limbas de su sistema.

No est su primu gestore de podcasts a disponimentu in sardu. Tempus a oe, Sardware at giai tradùidu su gestore Podbird pro dispositivos Ubuntu Touch, su primu sistema operativu mòbile disponìbile in sardu.

AntennaPod est a disponimentu pro dispositivos Android dae sa butega de aplicatziones Google Play e dae su repositòriu lìberu F-Droid.

Imprea su sardu in is dispositivos tuos!

Is istùdios narant chi in custu sèculu ant a isparèssere intre su 50 e su 90% de is idiomas de su mundu. Est responsabilidade de ònnia persone de contribuire a sa mantenidura de su sardu. Non dèleghes, piga·nde parte tue puru: informa·ti de is produtos chi traduimus, faedda·nde cun is amistades, ispàrghina sa boghe… Cumintza oe a modificare sa dieta tecnològica tua pro chi siat prus responsàbile linguisticamente: nàviga in sa rete cun su navigadore Mozilla Firefox pro Android e pro elaboradores, o tzarra cun is amistades tuas cun Telegram, a disponimentu pro Android, iOS e iscrivania (bide totu is progetos chi traduimus in www.sardware.org). Su sardu tocat a totus, e no est unu sacrifìtziu mannu a impreare cussos programmas chi permitint sa tradutzione in sardu.

Totu s’inteligèntzia nostra

Tenimus progetos medas pro frunire a su pòpulu nostru un’ecosistema de aplicatziones lìberas, èticas e in sardu, ma no acudimus a sa sola. Contribui oe cun dinare (incarca inoghe) o agiunghe·ti a nois: tradutzione, disinnu, gestione de retes sotziales, programmatzione… onni agiudu at a èssere fundamentale pro sighire a mantènnere su sardu bivu in s’àmbitu digitale!