Sa Consulta Intercomunale Gaddura, Sardware e su Grupu Tradutziones de ANS ghetant crida pro contribuire paris a sa presèntzia de su gadduresu e de su sardu in Wikipedia.
Nche sunt logos, non semper físicos, ue is lìnguas de su mundu esistint, mustrant de èssere bivas e de tènnere una comunidade ativa chi ddas faeddat e ddas iscriet. Unu de custos logos est Wikimedia Incubator, unu logu digitale de importu istratègicu a beru, ue oe su gadduresu tenet una pàgina, mancari ancora pitica, chi tenet gana de crèschere.
Sa Consulta Intercomunale Gallura at pensadu de collaborare cun Sardware e cun su grupu Tradutziones de s’Assemblea Natzionale Sarda pro incarrerare unu traballu colletivu, simpre in sa forma ma de balore mannu: isvilupare sa pàgina gadduresa de Wikimedia Incubator, cun s’obietivu de fàghere chi sa linga gaddurésa lompat a tènnere un’editzione reconnota de Wikipedia.
Sardware, dae sa parte sua, aporrit a su progetu s’esperièntzia in sa decolonizatzione de sa tecnologia, ponende a disponimentu materiales de agiudu comente tutoriales pro sa tradutzione de is pàginas de Wikipedia, memòrias de tradutzione e s’interfache de su Corretore Ortogràficu Sardu, in prus de totu is cumpetèntzias tècnicas e organizativas.
Su grupu Tradutziones de ANS donat materiales tradùidos in gadduresu e in sardu, chi ant a pòdere èssere impreados comente resursas pro Wikimedia Incubator, creende aici una retza de profetu intre sa produtzione linguìstica chi esistit giai e su fràigu de s’entziclopedia in lìngua gadduresa.
Ita est Wikimedia Incubator?
Wikimedia Incubator est su logu virtuale in ue is comunidades linguìsticas chi ancora non tenent un’editzione insoro de Wikipedia dda podent isvilupare. Si tratat de sa manera de Wikipedia de dimandare: a beru custa lìngua est faeddada, iscrita e amparada dae una comunidade bera?
Pro su gadduresu sa risposta est emmo. Ma custa risposta depet èssere iscrita, in su sentidu prus literale de su tèrmine.
Sa pàgina gadduresa de Wikimedia Incubator est giai acessìbile a custu indiritzu: https://incubator.wikimedia.org/wiki/Wp/sdn/Main_Page
Su còdighe ISO 639-3 de su gadduresu est sdn.
Pro ite est importante a impreare s’istandard ortogràficu
Pro mantènnere bivas is lìnguas minorizadas e fàghere chi siant protagonistas de is plataformas digitales, non bastat a nàrrere chi esistint: tocat a fraigare una comunidade ativa chi produat cuntenutos iscritos coerentes e verificàbiles.
Pro èssere reconnota dae Wikimedia comente lìngua autònoma, sa pàgina gadduresa depet sighire s’istandard ortogràficu ufitziale aprovadu dae sa Regione Sardigna cun sa deliberatzione DGR 11/11 de su 2024.
Impreare s’istandard est una cunditzione tècnica e fintzas política. Dae su puntu de bista tècnicu, chene de una coerèntzia ortogràfica su sistema no est capatzu de reconnòschere una lìngua e de dda seberare intre is àteras. Dae una bisura polìtica, sa coerèntzia ortogràfica donat a su gadduresu e a totu is lìnguas minorizadas una dignidade iscrita, est a nàrrere, una forma cumpartzida chi ddi donat tretos distintivos.
Chie podet partetzipare e comente
Chie bolet partetzipare at a pòdere tradùere pàginas de Wikipedia giai esistentes in àteras limbas o creare boghes noas.
Su progetu non rechedet cumpetèntzias linguìsticas o informàticas particulares. Rechedet sa voluntade de contribuire a s’isparghinadura de sa lìngua gadduresa in is ambientes digitales, de ischire iscrìere in custa lìngua o, a su mancu, de bòlere imparare a ddu faghere, cun una boghe isceti.
Fintzas is persones interessadas a ammanniare sa Wikipedia in sardu sunt bene bènnidas!
Is sessiones de traballu cumpartzidu ant a èssere in lìnia, s’ant a fàghere ogni mese e ant a cumentzare in cabudanni de su 2026.
Pro àteras informatziones e pro aderire a su progetu si podent cuntatare: sa Consulta Intercomunale Gaddura (consultadelgallurese@gmail.com), Sardware (a sardware@sardware.org o a su grupu de utentes de Telegram) o s’Assemblea Natzionale Sarda (info@assemblea.org).
0 commenti