Est cun totu su praghere chi annuntziamus una noa abetada dae meda: su Curretore Ortogràficu Sardu (COS) est ufitzialmente in lìnia in su situ de Sardware!
Sa detzisione de su guvernu de Sardigna de bogare dae su situ istitutzionale resursas comente su CROS o su ditzionàriu de Mario Puddu, chi amus denuntziadu in su 2024 cun custa lìtera aberta, at lassadu unu bòidu digitale pro chie iscriet in sardu. Mancari sa domo editora NOR a pustis ddas at torradas a pònnere in lìnia —e ddi torramus gràtzias pro custu—, dae pagu amus identificadu problemas de funtzionamentu. Est pro custu chi, aprofitende de su fatu chi su CROS est publicadu a suta de una lissèntzia permissiva (AGPL3), amus detzìdidu de ddu torrare a ofèrrere in sa pàgina nostra. Gràtzias a su traballu de s’assòtziu nostru, duncas, s’istrumentu chi in passadu fiat connotu comente CROS torrat a disponimentu de sa comunidade, immoe cun un’interfache noa.
Ite nch’at de nou? No est isceti una chistione de nòmine
Sa novidade prus manna est chi ddu presentamus cun un’interfache de su totu noa, prus lestra e moderna. Mantenimus, nointames, sa possibilidade de iscarrigare su pachete OXT pro pòdere impreare su curretore in LibreOffice/OpenOffice (agatades is istrutziones inoghe). Ma nch’est fintzas un’àteru càmbiu de importu: amus detzìdidu de ddu nominare curretore ortogràficu sardu.
Pro ite nch’amus bogadu s’agetivu «regionale»?
Pensamus chi sa lìngua sarda siat unu patrimòniu de sa gente de Sardigna e de su mundu intreu, no isceti un’aficu de s’istitutzione regionale. Custu curretore est un’istrumentu de su pòpulu e pro su pòpulu; duncas, su nòmine nou bolet rapresentare custu sensu de pertenèntzia prus ampru e lìberu.
Prontu pro su telèfonu e pro su benidore
S’interfache noa no est isceti prus bella de bìdere, ma est istada istudiada pro èssere otimizada a su 100% pro sos telèfonos mòbiles. Chi siat in biàgiu, in tzitade o in bidda, immoe si podent currègere is testos in sardu in manera pràtica deretu dae cale si siat dispositivu.
In ue s’agatat?
Podides giai impreare su curretore dae custa pàgina:
👉 Sardware – Curretore ortogràficu sardu
In prus, regordamus chi su curretore si podet impreare fintzas comente cumplementu de Mozilla Firefox, mantènnidu dae Sardware. Cun custa rinàschida de su COS, Sardware sighit sa missione sua de amparare e isvilupare sa lìngua sarda in su mundu de sa tecnologia. Sighide a nos sustènnere e… bona iscritura a totus!
Imprea su sardu in is dispositivos tuos!
Is istùdios narant chi in custu sèculu ant a isparèssere intre su 50 e su 90% de is idiomas de su mundu. Est responsabilidade de ònnia persone de contribuire a sa mantenidura de su sardu. Non dèleghes, piga·nde parte tue puru: informa·ti de is produtos chi traduimus, faedda·nde cun is amistades, ispàrghina sa boghe… Cumintza oe a modificare sa dieta tecnològica tua pro chi siat prus responsàbile pro cantu tocat a is lìnguas: nàviga in sa rete cun su navigadore Mozilla Firefox pro Android e pro elaboradores, o tzarra cun is amistades tuas cun Telegram, a disponimentu pro Android, iOS e iscrivania (bide totu is progetos chi traduimus in www.sardware.org). Imprea cussos programmas chi permitint sa tradutzione in sardu: su sardu tocat a totus.
Totu s’inteligèntzia nostra
Tenimus progetos medas pro frunire a su pòpulu nostru un’ecosistema de aplicatziones lìberas, èticas e in sardu, ma no acudimus a sa sola. Contribui oe cun dinare (incarca inoghe) o agiunghe·ti a nois: tradutzione, disinnu, gestione de retes sotziales, programmatzione… onni agiudu at a èssere fundamentale pro sighire a mantènnere su sardu bivu in s’àmbitu digitale!
Àteras informatziones:
https://www.sardumatica.net/2026-03-29-bos-oferimus-torra-su-cros-in-linia
0 commenti