Unu passu a in antis de importu pro sa comunidade faeddadora de su gadduresu: s’assemblea de sa Consulta Intercomunale at seberadu comente presidenta noa a Catalina Vittória Roselli. Mediadora linguìstica, esperta de gadduresu, istudiosa de culturas e lìnguas minorizadas e de is acàpios issoro cun su gènere, est fintzas ativista chi collàborat cun is realidades assotziativas de su territòriu, comente Assemblea Natzionale Sarda e Sardware.
Tenimus sa seguresa chi sa cumpàngia de Sardware at a ghiare sa Consulta cun totu s’espertesa, is cumpetèntzias e s’entusiasmu contagiosu suo. In is decraros de custas oras, sa presidenta at bogadu a pìgiu s’importàntzia de su traballu cumpartzidu in iscuadra e de su fràigu de alleàntzias, valores in chi nois creimus a forte. Custa eletzione, in prus, sinnat una bortada ùnica in su panorama linguìsticu de Sardigna: issa est, difatis, sa prima fèmina a otènnere custa càrriga. Tenimus sa cunvintzione chi su traballu de Catalina, chi ponet in raportu s’ativismu linguìsticu cun cussu contra de is opressiones natzionale e de gènere, nos at a agiudare a castiare de manera ancora prus cussiente e rispetosa a is comunidades linguìsticas nostras. Comunidades chi sunt plurales, diversas e, a dolu mannu, semper traessadas dae tratamentos de podere e gerarchias.
Su caràtere simbòlicu ma prus che totu efetivu de s’eletzione de Catalina Vittória Roselli sinnat unu brincu a in antis chi nos prenat a cùcuru de isperàntzia pro su benidore.
Augùrios mannos dae Sardware, Catalina!
0 commenti